انا مرام لما كان عمري 16سنه ماكنتش نعرف شي ع شبكات التواصل الاجتماعي وهلي كانو واعرين وبذات بابا الموبايل مايبش يشريه ليا الا بعد نخش لجامعه
وانا مازلت نقرا ف ثالثه ثانوي
بعد كم يوم نشوف ف صحباتي عندهن ايميلات ع فيس وحده فاتحه واتس وغيرهن بصراحه من كثر مايحكن عليهن قلت لصحبتي اديرلي حساب ع فيس
وقررت نفتحه بعد بابا مايكونش ف الحوش هو و خوتي نفتح من الكمبيوتر
وتميت نفتح ف غيابهم ضفت صحباتي وقريباتي وبس وننشر وعجبني الجو فيه بديت ننشر حتى ف قروباات
ف يوم وانا فاتحه الفيس جتني ااضافه من شاب
بصراحه كنت متردده نقبله لأن ماعمريش حكيت مع شاب وصحباتي يعرفوني اني مش جو علاقات وكنت متردده نقبله
بعد كل مانمشي للمدرسه نجتمعو انا وصحباتي ويحكن ع شباب حكيت معاه وكذا
حسيت انا الوحيده فيهن مختلفه
بعد روحت قررت نقبل اضافة الشاب فعلا قبلتها
وخش حكى معاي الشاب وحكيت معاه عادي وقتله اسمي بس لكن هو عرفني عليه بالكامل
بعد كم يوووم تعودت نحكي معاه وهو تعود يحكي معاي
انا مانفتحش ف النت هلباا عشان هك كل مانفتح يكتبلي رايفت عليك
انا كملت الثانوي ونجحت بي نسبة عاليه وقررت انا وصحباتي نخشو لنفس الجامعه
طبعا من فرحتي انهم قبلوني ف جامعه قررت نحكيها لأيوب
(ايوب هو الشاب االلي قبلت اضافته ع فيس )
ايووب فرح عشاني وف يوم نحكو انا وياه اعترفلي بحبه وقاالي نبيك تكوني حبيبتي انا حبيتك بطيبتك واخلاقك
انا خفت قتله جو الحب منحيته من راسي ومستحيل يصير بينا علاقه قعد يحاول شهرين كاملات وهو يحاول بعد شفت حبه ليا
وكلامه قلت هذا يحبني وكل صحباتي دايرات علاقات ليش حتى انا مانحب مش ناقصني شي
وافقت ع علاقه وبديت نحبه ونتعلق بيه اكثرر
بدت الجامعه وبابا شرالي فون
واول شخص كلمته هو ايوب وحكينا وفرح ان سمع صوتي وقعد كل يوم يتصل عشان يسمع صوتي
بعدها قرر ايوب انه يشوفني وقال انه بيجيني لجامعه انا طبعا فرحت وقررت نلبس احلى لبسه
وجا الصبح ولبست ومكيجت ع خفيف ومشيت لجامعه وقررت نفوت المحاضره ع خاطره
وجا لجامعه اتصل بي وقالي انا جيت طلعت نشووفه ف الساحه
شافني وشفته وكنت فرحااااانه وبعتلي مسج وقالي تهبلي وكان مع صاحبه ماقدرش يتصل بي
وروحت للحوش طاااايره من الفرحه واتصل بي وقالي حملي الواتس والفيس ع جهازك عشان نحكو ف الليل وانا فرحت مشيت نحمل الواتس والفيس
وطبعا سجلت رقمه بأسم صاحبتي عشان هلي مايشكوش
جا الصبح ومشيت لجامعه وحكيت لصحباتي اني ع علاقه كلهن انصدمن مستحييييل ماصدقنش كذبني بس لما اتصل بي ورديت عليه جن كلهن يسمعن ف الصوت بعدها صدقن لكن نصهم معارضات حبي له
بعدها تطورت لحكايه وتمينا نحكو حتى ف ليل ع واتس ويقولي نحبك وانا نقوله نحبك ياروحي انا تريحتلك وهو يقولي مافش بنت غيرك ف حياتي والله انتي الوحيده وح تكوني الوحيده انتي اللي بطيبتك وحنانك تختلفي ع بناات وو و و
بعد كم شهور قررت نشوف منشورات وبنات يعلقن غررت وتمنيت نخش ع بناات ونهزبهن ونقوللهن هذا حبيبي اناا بس
مشيت نتصل بيه ونشكيله ع بنات وانه يحذفهن قاالي هذن اقارب مانقدرش نحذفهن حسيت بيه يكذب جاني احساس انه مش قريباته
قلت خليني نجربه مش خاسره شي مشيت خشيت عليه بحساب ثاني وقبل اضافتي وحكى معاي بجوو ضحك وانا مقهوووره ونبكي واصلت معاه عطاني رقمه
انا ف الوقت هذا انهررت انصدمت فيه ماقدرتش نواجهه سكتت لإني نحبه ونموووت فيه
ثاني يوم اتصلت بيه وقتله اختار يا انا يا البنات اللي عندك قالي ماتقارنيش روحك بيهن انتي اللي نحبك بس هذن هك نحكي معاهن وخلاص
سكتت وتحملت وصدقته بعدها شفت منشور له كاتبتله بنت نجك لي ،، لا هكي اووفر قررت نخش ع بنت وفعلا خشيت وحكيت معاها وهي تمدح ف ايوب قلتلها انا حبيبته ضحكت وقالتلي ايوب ماعندش حبيبه هوهك قاالي
انصدمت اناااا
معش تحملت هزبت البنت وقلتلها بعدي ع حبيبي وراه لي ويحبني
بعد ساعه يتصل بي ايوب ويهزبني انتي كنك هك انتي هبله ليش تشهدري بعلاقتنا وتمه يهزب وانا نبكي
نفتح الفيس نلقاه حاظرني ع خاطر البنت
بكيت قعدت كم يوم نتصل بيه حطني ف الحظر نبعتله رسائل انه يفك حظر الاتصال عشان نتفاهمو وفك الحظر واتصلت وحكينا وقتله اسفه مانقدرش انبعد عليك ومعش ندخل ع اضافات ولا ع بنات قالي خلاص تمام وردينا نحكو عادي ويجي لجامعه كم مررره عشاني ونشوفو ف بعضنا
بس تمينا نتعاركو ويحظر فيا ونرجعو لبعض طبعا انا اللي نتنازل هلبا ع خاطر نحبه وهوجابلي نتيجتي اني نجحت ،
وصلت ل ثانيه جامعه مش متريحه قلت نجربه ، جربته وخاني اخره بس قلت خيانه ع نت احسن مايكون ع واقع وصدقو اللي قالو الحب اعمى صدقته انه يحبني واستمرت علاقتنا 4سنوات حبينا بعض حب ومعش شفت شاب غيره حتى ف جامعه بعدها يجي يووم انبصر معاه ف كلمه انا وياه ع فيس يهزبني ويكتبلي انتي ف طريق وانا ف طريق كيف ع بصاره بسيطه
تمحي الماضي اللي عشنااه عشرة عمر 4 سنوات
والله حبيته ماتوقعتش انه حبنا ينتهي هكي انا حبيته من قلبي نرسم ف عقلي كيف بنكون معاه
نجيبو صغار ويكون اب لعيالي
.
الحب فطره والقلب لا اراديا شعور الكره والحب الشوق وغيره مش بيدك ولا انتي تتحكمي بيه انا حبيته حب صادق ولا عمري خنته في حياتي
قتله ليش هكي حرام نخسرو بعضنا ع سبه شي تافه قالي معش نبي حب ولا نبي قصص بنات
،
من قبل مانبصر عليه فتحتله موضوع الخطوبه ان لنا وين نحبو بعض وماتقدمتليش كان رده اني اا مازلت اصغير وحتى شغل ماعندي مازال بدري ع موضوع هذا وسكريه معش تفتحيه بكل ودنيا نصيب طبعا هو م 92
وجعني رده وسكتت بس بعد لبصاره حسيت انه سبله ومسكها عشان يهرب مني لإني نفتحله ف سيرة الخطوبه واني نرفض ع خاطره شباب وهو ماصدق حصلها وحظرني من ع فيس وع واتس وحتى الاتصال معش تواصلنا لبعضنا نهائي خشيت ف جو كٱبه لمده شهرين نكملها نوووم ومانحكيش مع حد متضايقه ونبكي كل مانذكره نساااني بسهوووله كان شهرين يجري وراي عشان نوافق عليه تي شن غييره بس
.
نبكي ف الليل ع مخدتي ونبكي ونصلي وندعي حسبي الله ونعم الوكيل خدعني وكذب علي
بعد شهور قررت نكون قويه ومعش يهمني حد ولا عاد نحكي مع شباب وشلت الحب من بالي ف يووم مشيت لصاحبتي نهدرزوو بناات وصاحبتي جايينها بنات وقعدنا نهدرزو وحده منهن تجيب سيرة ايوب ع لسانها جذبني الموضوع قلتلها كيف تعرفيه قالتلي كنت ع علاقه معاه
وانا ف عقلي نقول 👇
اااه ياقلبي وانا كنت نقووول شن غيره وهو كان داير علاقه ويخون فيااا
المهم قالتلي البنت كان يكلم فيااا ويقولي نحبك ونموت فيك ويجي يشوف فيا بس ماحبيتش مشيت جوي معاااه واسليت بيه وفته وحبت وحداخر
يعني بالمختصر خاناته سبحااان الله كما تدين تدااان يا ابن ادم
وانا نقول عشان طيبتي سيبني ع خاطر البنت اللي خاناته
يستاهل اللي جااه عذبني وماقبل تأقلمت ع وضع ومرت سنتين
ويجوني خطااب وانا طلعت ع العرب وشافوني وعجبو بيا وحددنا للمقابله وشفته وتريحتله وحكيت معااه وحبني وحبيته حب #بالحلال
يخاف علي ويطمن علي يبعتلي ف مسجات مايزعلش في ولو زعلت يراضيني دغرري
الحاجات اللي تمنيت ايوب ايديرهن لي
دارهن لي خطيبي
حمدت ربي ان عوضني بأنسان كويس وخلوق ويحبني ويعاملني معامله كويسه ودمه خفيف
،
بعد شهور من خطوبتي يبعتلي ايوب مسج
انا ندمان اني ضيعتك انتي الوحيده اللي حبيتك انتي مافش منك انا الغلطان اللي سيبتك لغيري خطيبك محظوظ ونحسده لأن واخذك يا ريت يعودن لأيام عشان نصحح غلطي
نزلت دمعتي وكتبتله مسج
الله يسامحك وربي يهنيك ويرزقك بي بنت حلال تحبك وتعطيك الحب اللي انا ماعطيتهولك وربي يسامحك على كل شي درته فيا ،،
.
انا توا فرحانه مع خطيبي وفرحنا قريب وربي يخليه لياا
العبره بالقصه انك ماتصدقيش اي كلام لأن الكلام مسهله وبالبلاش
الحب افعال اللي يحبك صح يخاف عليك يدير شي عشان تكوني جنبه بالحلال وماياخذك غيره
ولو انظلمتي ماتخافيش لان فووق فيه ربي ويشوف فينا وماينسى حد ... وربك لا يظلم احد
كما تدين تدان .. الدنيا دواره يوم لك ويوم عليك سوا بالخير او بالشر ..
وفيه شي اخره حابه نقوله
ان الشخص لا يدرك قيمة الشي الا بعد فقدانه
0 التعليقات: